തമാശയിലെ ചിന്തകൾ

ഭരതമുനിയുടെ നാട്യശാസ്ത്രത്തിലെ നായകസങ്കല്പത്തിൽ തുടങ്ങി സൗന്ദര്യ സങ്കൽപ്പങ്ങളെക്കുറിച്ചുള്ള വാർപ്പുമാതൃകകളെ ഉടച്ചു വാർക്കുന്ന  'തമാശ' വെറുമൊരു തമാശപ്പടം മാത്രമല്ല. അതുനുമുകളിൽ  പ്രേക്ഷകനെ വല്ലാതെ ഇളിഭ്യനാക്കി നിലവിലെ സൗന്ദര്യബോധത്തിന്റെ  പൊതുധാരണകളെ പൊളിച്ചെഴുതുന്നുണ്ട്.  പടം തുടങ്ങിയതുമുതൽ നിർത്താതെയുള്ള ചിരിയുടെ മാലപ്പടക്കം.  ചിന്നുവിന്റെ entry മുതൽ പുറകിലെ സീറ്റിലിരുന്ന പയ്യൻ ആദ്യം  തടിയെ പരിഹസിച്ചു ; 'ഇതെന്തൊരു തടിയാ'.  തുടർന്ന് ചിന്നുവിന്റെ  ചിരിയെ പരിഹസിക്കുകയും അനുകരിക്കുകയും ചെയ്തു കൊണ്ടിരുന്നു.  Fb photo പോസ്റ്റിനുള്ള ചിന്നുവിന്റെ ശ്രീനിവാസനോടുള്ള  മറുപടിയിൽ അവൻ നിശബ്ദനായി.  പടമവസാനിച്ചപ്പോഴും ടൈറ്റിൽ കാർഡുകൾ മിന്നിമറഞ്ഞപ്പോഴും നിശബ്ദനായി അവനും സുഹൃത്തും കസേരയിൽ അനങ്ങാതെ ഇരിക്കുന്നുണ്ടായിരുന്നു.  പരസ്യകമ്പനികൾ സൃഷ്ടിച്ച സൗന്ദര്യ സമവാക്യങ്ങൾക്കപ്പുറം പൊതുബോധത്തെ  മിഥ്യാധാരണകളിൽ നിന്നും മോചിപ്പിക്കാൻ ഇത്തരം സൃഷ്ടികൾ അനിവാര്യമത്രേ. വിനയ് ഫോർട്ടിന്റെ ഏറ്റവും മികച്ച പെർഫോമൻസ്. ചിന്നുവിന്റെ പക്വതയാർന്ന രസകരമായ  അഭിനയം,  നവാസ് വള്ളിക്കുന്ന്  അഭിനയിക്കുകയാണെന്ന ചിന്ത പലയിടത്തും കാഴ്ചക്കാരന്റെ മനസ്സിൽ നിന്നും അപ്രത്യക്ഷമാക്കി.  അഷ്‌റഫ്‌ ഹംസയെന്ന  സംവിധായകനിൽ നിന്നും ഇനിയും മികച്ച സൃഷ്ടികൾ പ്രതീക്ഷിക്കാം.