ഒരു തുറന്ന വായനായിടത്തിലേക്ക്......

ഇത്രത്തോളം വായനാശാലകളുള്ള നമ്മുടെ നാട്ടില്‍ "നിഴലാട്ടം" നടത്തുന്ന 'തുറന്ന വായനായിടത്തിന്‍റെ' പ്രസക്തിയെന്താണ്?

ചോദ്യം ഒരു സുഹൃത്തിന്‍റെയാണ്. സുഹൃത്തിനെ തെറ്റ് പറയാനാകില്ല. സമാനചിന്താഗതിക്കാരായ അനേകം സുഹൃത്തുക്കള്‍ക്കിടയിലാണ് നാം ജീവിക്കുന്നത്. തുറന്ന വായനായിടമെന്നത് വെറും അക്ഷരങ്ങള്‍ കൈമാറ്റം ചെയ്യപ്പെടുന്ന ഇടങ്ങളല്ലാ. മറിച്ച് ആശയങ്ങളിലൂടെ ആയുധങ്ങള്‍ കൈമാറ്റം ചെയ്യപ്പെടുന്ന ഇടങ്ങളാണ്. 

 "Hungry man, reach for the book: it is a weapon". (Bertolt Brecht)

ഒരാളൊരു പുസ്തകം വായിക്കുന്നതിലൂടെ ഒരു വിപ്ലവവും ഉണ്ടാകാന്‍ പോകുന്നില്ല. വായിക്കപ്പെടുന്ന ആശയങ്ങള്‍ സംവാദങ്ങളിലൂടെ, ആശയപരാവര്‍ത്തനങ്ങളിലൂടെ കൊള്ളക്കൊടുക്കലുകളിലൂടെ തേച്ചുമിനുക്കിയെടുത്താലേ ഒരു പുതുലോകക്രമം സൃഷ്ടിക്കാന്‍ സാധിക്കുകയുള്ളൂ. 

വായനാശാലകളിലെ അടച്ചുകെട്ടിയ നാലുചുവരുകള്‍ക്കുള്ളില്‍ ആശയങ്ങള്‍ സ്വീകരിച്ച് തലയുയര്‍ത്തുമ്പോള്‍ 'നിശബ്ദത പാലിക്കുക' എന്ന ബോര്‍ഡില്‍ നോക്കി സ്വയം നിശബ്ധനാകേണ്ടി വരുന്ന തലമുറയെയല്ലാ നമുക്കാവശ്യം, മറിച്ച് തലയുയര്‍ത്തി ചര്‍ച്ചകളിലൂടെ ആശയകൈമാറ്റങ്ങളിലൂടെ വിപ്ലവത്തിലൂടെ സര്‍ഗാത്മകതയിലൂടെ നവതരംഗം സൃഷ്ടിക്കാന്‍ കഴിയുന്ന തുറന്ന മനസ്സുകളാണ് ആവശ്യം. 

കണ്ണാടിപ്പെട്ടികളിലും ഇരുമ്പലമാരകളിലും വീര്‍പ്പുമുട്ടിക്കഴിയുന്ന ആശയങ്ങളെ തെരുവുകളിലേക്കു വലിച്ചിഴയ്ക്കുക, ചുവരുകളില്ലാത്ത ലോകം സൃഷ്ടിക്കാം, മാനവീയം തെരുവോരങ്ങളില്‍ വസന്തം വിരിയട്ടെ. നിഴലാട്ടം അക്ഷരവീഥി തുറന്നവായനായിടത്തിന്‍റെ കനലുകള്‍ മാനവീയം തെരുവില്‍ നിന്നും മറ്റു തെരുവുകളിലേക്ക് പടര്‍ന്നുപിടിക്കട്ടെ 

"വായിച്ചുകഴിഞ്ഞ പുസ്തകം ഞാനെന്‍റെ വീടിനുമുന്നിലെ ചവറുപെട്ടിക്ക് മുകളില്‍ കൊണ്ടുപോയി വയ്ക്കുകയാണ് പതിവ്. ആ പുസ്തകാശയം എന്നെ തേടിയെത്തിയപോലെ  മറ്റുപലരെയും തേടി എത്തേണ്ടതുണ്ട്. ഞാനതിന് തടസമായിക്കൂടാ"       

                                          (പൌലോ കൊയ്‌ലോ)