ചില സിനിമകള്‍ അങ്ങനെയാണ്. വലിയ ഓളങ്ങളില്ലാതെ എത്തിച്ചേരും. അത് തേടിപ്പിടിച്ച് കണ്ടില്ലെങ്കില്‍ നഷ്ടം അതിന്‍റെ അണിയറപ്രവര്‍ത്തകര്‍ക്കല്ലാ, നമുക്കാണ്. അത്തരത്തില്‍ ഈ ജൂണ്‍ 17ന് എത്തിച്ചേരാന്‍ പോകുന്ന ചിത്രമാണ് 'ഒഴിവു ദിവസത്തെ കളി'. അലസമായ സിനിമാകാഴ്ചകളിലൂടെ കടന്നുപോയിക്കൊണ്ടിരുന്ന കഴിഞ്ഞ IFFK കാലത്താണ് തീര്‍ത്തും അലസനായി ഒഴിവുദിവസത്തെകളി കാണാന്‍ ചെന്നിരുന്നത്. സിനിമ തുടങ്ങി പത്തുമിനുറ്റ് കഴിഞ്ഞതും മനസിലായി ഈ ചിത്രം കണ്ടുപഴകിയ സിനിമാകാഴ്ചകളോ മേക്കിംഗോ അല്ല. പതിവ് സിനിമാനുഭവങ്ങള്‍ക്കുപകരം ഈ കളി വേറിട്ട അനുഭൂതിതന്നെയാണ്. ഷെഡ്യൂള്‍ നോക്കി ഭക്ഷണം പോലുമില്ലാതെ ഓടിയോടി സിനിമകള്‍ കണ്ടുതീര്‍ക്കുന്ന സിനിമ ഉത്സവത്തിനിടയിലും പ്രോജെക്ടര്‍ ഒരുമണിക്കൂര്‍ പണിമുടക്കിയപ്പോള്‍ ഈ ചിത്രം പൂര്‍ണമാകാതെ എഴുന്നേല്‍ക്കില്ലായെന്നു വാശി പിടിച്ചെങ്കില്‍ അതെന്‍റെ പിടിവാശിയല്ല, ആ ചിത്രത്തിന്‍റെ ശക്തി തന്നെയാണ്.
തിരഞ്ഞെടുപ്പ് ദിവസം ഒഴിവുദിവസമാകുന്നതില്‍ തുടങ്ങുന്ന ഒഴിവുദിവസത്തെ കളിയുടെ രാഷ്ട്രീയം പലരൂപത്തില്‍ സിനിമയിലുടനീളം കാണാം. പുഴ, ചക്ക, കോഴി, മദ്യം, പെണ്ണ്, തിരഞ്ഞെടുപ്പ്, നിറം ഇവയിലൂടെയെല്ലാം കടന്നുപോകുന്ന ഏഴു അഭിനേതാക്കളിലൂടെ ചെറിയകാടൊരു വലിയരാജ്യമായി രൂപാന്തരപ്പെടുന്നു. ഒഴിവുദിവസത്തെ കളിയിലൂടെ ഒരു ശരാശരി മലയാളിയുടെ മനസിലൂടെ സഞ്ചരിച്ച് അവന്‍റെതന്നെ ചിന്തകളെ ചികഞ്ഞ് പുറത്തേക്കിട്ട് അതിന്‍റെ ദുര്‍ഗന്ധം സ്വയം അനുഭവിപ്പിക്കുകയാണ്‌ സംവിധായകനായ സനല്‍കുമാര്‍ ശശിധരന്‍. അവാര്‍ഡ്‌ കിട്ടുന്ന സിനിമകളെല്ലാം സാധാരണ പ്രേക്ഷകരുമായി സംവേദിക്കുന്നതല്ല എന്നുള്ള അബദ്ധജടിലമായ ചിന്തകളെല്ലാം അസ്ഥാനത്താണെന്ന് ഈ സിനിമ ബോധ്യപ്പെടുത്തും.
NB: ഇതുവരെ കണ്ടുപരിചയിച്ചിട്ടില്ലാത്ത നവ്യമായ ദൃശ്യശ്രവ്യ അനുഭവത്തിലേക്ക് മലയാള സിനിമയ്ക്ക് പുതിയ മാര്‍ഗദീപമായ "ഒഴിവു ദിവസത്തെകളി" ഈ ജൂണ്‍ 17ന് തിയേറ്ററുകളിലേക്ക് എത്തിച്ചേരുമ്പോള്‍ ഏറ്റവുമടുത്ത നിങ്ങളുടെ ഒഴിവുദിവസത്തില്‍ തന്നെ ആ സിനിമ ഒന്ന് കണ്ടിരിക്കേണ്ട ബാദ്ധ്യത നിങ്ങള്‍ക്കോരോരുത്തര്‍ക്കുമുണ്ട്.
"നിങ്ങള്‍ എന്തായാലും വരുമെന്നറിയാം;
ഒപ്പം ഒരാളെക്കൂടെ കൂട്ടുക"
Comments