അഞ്ചുദിവസം നീണ്ടു നിന്ന ടീം നിഴലാട്ടത്തിന്‍റെ ചിത്ര ഹ്രസ്വചിത്ര കലാ പ്രദര്‍ശനം ഇന്നലെ കനകക്കുന്നില്‍ സമാപിച്ചു. കല ഏറ്റവും മനോഹരമായൊരു വിപ്ലാവായുധമാണെന്നു പറഞ്ഞുകൊണ്ട് നടത്തിയ പ്രദര്‍ശനത്തിന്‍റെ പ്രത്യേകത അത് വ്യത്യസ്ത കലകളെയെല്ലാം ഒരു പോലെ ഒരേ രാഷ്ട്രീയത്തില്‍ ഒന്നിപ്പിക്കുന്നുവെന്നുള്ളതാണ്. സിനിമയും ഹ്രസ്വചിത്രങ്ങളും ഫോട്ടോഗ്രാഫിയും ചിത്രകലയും നാടകങ്ങളും നാടന്‍പാട്ടും മൈമുമെല്ലാം ഒരേ പ്രാധാന്യത്തോടെ ഒരേ അരങ്ങില്‍ ഒന്നായി കൂട്ടിയോജിപ്പിക്കപ്പെട്ടു. ഇഷ്ട ഗായകനെ ആസ്വദിക്കുന്നതും ഇഷ്ടഭക്ഷണം കഴിക്കുന്നതും മനസിന്‍റെ ഇഷ്ടാനിഷ്ടങ്ങള്‍ക്കപ്പുറത്ത് പ്രതിരോധമായി മാറിക്കൊണ്ടിരിക്കുന്ന ഈ കാലഘട്ടത്തില്‍ വാക്കുകളിലൂടെ വരകളിലൂടെ ഫ്രെയിമുകളിലൂടെ ചിന്തകളിലൂടെ മുഖ്യധാരാ പാതയില്‍പ്പെട്ടുപോകാതെ വേറിട്ട്‌ പ്രവര്‍ത്തിക്കുന്നവര്‍ക്കായി ഒരു സമാന്തര പാത വെട്ടിയെടുത്ത്‌ സഞ്ചാരയോഗ്യമാക്കിയിരിക്കുന്നു ടീം നിഴലാട്ടം. കലകള്‍ ഏതായാലും ഇക്കിളിപ്പെടുത്തി കടന്നുപോകേണ്ടതല്ല, അത് ശബ്ദം നഷ്ടപ്പെട്ടവന്‍റെ ശബ്ദമായും ചലനം നഷ്ടപ്പെട്ടവന്‍റെ ചലനമായും ചിന്തകള്‍ നഷ്ടപ്പെട്ടവന്‍റെ ചിന്തയായും മാറേണ്ടതാണെന്ന് ഉറക്കെ പ്രഖ്യാപിക്കുന്ന ടീം നിഴലാട്ടത്തിന്‍റെ ഡോക്യുമെന്റ്ററി ചിത്രം 'Holy Hell' ഉം അതിന്‍റെ ലക്ഷ്യവും ഈ കലകളുടെ സംഗമത്തിന് മാറ്റ് കൂട്ടുന്നുണ്ട്. കഴിഞ്ഞ വര്‍ഷത്തെ കലോല്‍സവത്തില്‍ സാമ്പത്തികമില്ലായ്മ വരുത്തിത്തീര്‍ത്ത ചെറിയ ചെറിയ പരാധീനതകള്‍ ഈ വര്‍ഷവും സമ്പത്തികത്തിന്‍റെ അഭാവത്തിലും യുവത്വത്തിന്‍റെ കൂട്ടയ്മയിലൂടെ മറികടക്കാന്‍ കഴിഞ്ഞിരിക്കുന്നു.
വര്‍ണങ്ങളും വരകളും ചിന്തകളും ചിത്രങ്ങളും നിരീക്ഷിക്കപ്പെടുകയും നിയന്ത്രിക്കപ്പെടുകയും ചെയ്യുന്ന ഫാസിസ്റ്റ് ഭരണതന്ത്രങ്ങള്‍ക്കെതിരായി ശബ്ദിച്ചു നിശബ്ദനായിത്തീര്‍ന്ന എം.എം.കല്‍ബുര്‍ഗിയുടെ നാടകം 'ബാസവേശ്വരന്‍റെ വിപ്ലവം' (പ്രസാധകര്‍:BOOK PORT, പരിഭാഷ: പി.പി.സത്യന്‍) വില്‍പനയ്ക്കായി ഇടമൊരുക്കിയും അതിഥികള്‍ക്ക് അതിന്‍റെ കോപ്പിക്കൊപ്പം രക്തപുഷ്പവും നല്‍കി അരങ്ങിലൂടെ അക്ഷരങ്ങളിലൂടെ പ്രതീകാത്മകമായി കല്‍ബുര്‍ഗിയുടെ നിശബ്ദത ഉഗ്രസ്ഫോടനമാക്കി തീര്‍ക്കാനും ടീം നിഴലാട്ടത്തിനായി.
"ഇന്നലെ രാത്രി ഏതോ യാമത്തില്‍
വാതിലില്‍ മുട്ടുന്ന ശബ്ദം.
ഇതുപോലെ ഏതു വാതിലിലും
എപ്പോള്‍ വേണമെങ്കിലും മുട്ടുന്ന ശബ്ദമുണ്ടാകാം"
(വരികള്‍ക്ക് കടപ്പാട്: കന്നഡ എഴുത്തുകാരി ഭാനു മുഷ്താഖ്)
വാതിലില്‍ മുട്ടുന്ന ശബ്ദം.
ഇതുപോലെ ഏതു വാതിലിലും
എപ്പോള്‍ വേണമെങ്കിലും മുട്ടുന്ന ശബ്ദമുണ്ടാകാം"
(വരികള്‍ക്ക് കടപ്പാട്: കന്നഡ എഴുത്തുകാരി ഭാനു മുഷ്താഖ്)
ഇങ്ങനെയുള്ള ശബ്ദങ്ങള്‍ക്കെതിരെ ശക്തമായി നിലകൊള്ളാന്‍ ഇത്തരം കൂട്ടായ്മകളും അവയില്‍ നിന്ന് ലഭിക്കുന്ന ഊര്‍ജവും അനിവാര്യമത്രേ... കഠിനമായതിനെതിരെ ശക്തമായി പോരാടാന്‍ നിഴലുകളുടെ ഈ ചലനത്തിന് എക്കാലവും കഴിയട്ടെ...
ബാസവേശ്വരന്‍റെ വിപ്ലവമെന്ന നാടകം കല്‍ബുര്‍ഗി എഴുതി അവസാനിപ്പിക്കുന്നത് ഇങ്ങനെയാണ്.
"കഠിനമായത് തകരും
ചലിക്കുന്നത് നിലനില്‍ക്കും"
നിഴലുകളുടെ ഈ കൂട്ടായ്മയ്ക്ക് ആശംസകള്‍...
നിഴലുകളുടെ ഈ കൂട്ടായ്മയ്ക്ക് ആശംസകള്‍...
Comments