മുന്നറിയിപ്പ്‌ കണ്ടു.അത് വലിയൊരു മുന്നറിയിപ്പായി മനസ്സില്‍ നില്‍ക്കുന്നു. സിനിമയിലുടനീളം നീണ്ടു നില്‍ക്കുന്ന ഉദ്യോഗഭരിതമായ നിമിഷങ്ങള്‍. സിനിമ കഴിഞ്ഞ് മണിക്കൂറുകളായിട്ടും ശരീരത്തിലെവിടെയോ ഒരു പേടി, ത്രാസം തങ്ങി നില്‍ക്കുന്നു. വളരെ യഥാതഥമായുള്ള കഥ പറച്ചില്‍. ഉണ്ണി ആറിന്‍റെ മികച്ച തിരക്കഥയും വേണുവിന്‍റെ മികച്ച ദൃശ്യാനുഭവവും സംവിധാനപാടവവും. ബിജിപാലിന്‍റെ പിന്നണി സംഗീതം ചിത്രത്തെ കൂടുതല്‍ മനോഹരമാക്കുന്നു.
സി.കെ. രാഘവന്‍റെ ചിന്തകളും സംഭാഷണങ്ങളും കാഴ്ച്ചക്കാരനെ വല്ലാതെ വേട്ടയാടുന്നു. സി.കെ. രാഘവനായി മമ്മൂട്ടി അഭിനയിക്കുകയല്ലാതെ അനുഭവപ്പെടുത്തിയ ചിത്രം. അപര്‍ണയുടെ സ്വതന്ത്ര പത്രപ്രവര്‍ത്തകയായുള്ള കഥാപാത്ര പരിവര്‍ത്തനവും കുറ്റമറ്റത് തന്നെയാണ്. ചിത്രത്തിലുടനീളം മിന്നിമറയുന്ന എല്ലാ കഥാപാത്രങ്ങള്‍ക്കും അവരവരുടേതായ വ്യക്തിത്വം ഉണ്ടായിരുന്നുവെന്ന് എടുത്തുപറയാതെ വയ്യ... ഒരുപാടുനാളുകള്‍ക്ക് ശേഷം മുഴുകിയിരുന്നുകണ്ടൊരു മലയാള ചിത്രം.
പറഞ്ഞതിലിനി പറയാനുള്ളത്:
എന്തൊക്കെയായാലും ചിത്രം നല്‍കുന്ന സന്ദേശം നെഗറ്റീവാണ്. പിന്നെ ഏതൊരു കലയുടെയും ഉദ്ധേശം ജനങ്ങളെ ശുദ്ധീകരിക്കുക എന്നുള്ളതല്ലല്ലോ, മറിച്ച് സമൂഹത്തില്‍ എന്തൊക്കെ നടക്കുന്നുവെന്ന് കാട്ടിക്കൊടുക്കുകയാണ്‌. അതുകൊണ്ട് ഈ ചിത്രം എനിക്ക് നല്‍കിയത്‌ മികച്ചൊരു അനുഭവം തന്നെയാണ്.
ചിത്രത്തിലെ സി.കെ. രാഘവന്‍റെ തന്നെ വാക്കുകളെ കടമെടുത്ത്‌ പറഞ്ഞാല്‍
"സ്വാതന്ത്ര്യത്തെ നമ്മള്‍ എങ്ങനെ വ്യാഖ്യാനിക്കുന്നു എന്നതാണ് കാര്യം..."
സ്വാതന്ത്ര്യം അത് ആരുടേതാണെങ്കിലും വിലപ്പെട്ടത് തന്നെയാണ്...
Comments