നിരീശ്വരനിലൂടെ ഈശ്വരനെ ചോദ്യം ചെയ്യുന്ന നോവൽ എന്ന മുൻധാരണയിലാണ് വി. ജെ. ജയിംസിന്റെ 'നിരീശ്വരൻ' എന്ന നോവലിലേക്ക് കടന്നത്. വായന മുഴുമിപ്പിക്കുമ്പോൾ അത് എതിർത്തത് വിശ്വാസത്തെ മാത്രമല്ല അതിനപ്പുറം വിശ്വാസത്തെ അന്ധവിശ്വാസമെന്ന ചാപ്പ കുത്തി അതിൽ വിശ്വസിക്കുന്ന വിശ്വാസരഹിതരെന്ന വിശ്വാസികളെയും കൂടിയാണെന്ന് മനസിലായി. എല്ലാം മനസിന്റെ, ചിന്തകളുടെ, പ്രവർത്തനങ്ങൾ മാത്രം. അത് ചിലപ്പോൾ വിശ്വാസത്തിന്റെയോ അവിശ്വാസത്തിന്റെയോ കണ്ണുകളിലൂടെ നോക്കാൻ നമ്മളെ സ്വാനുഭവത്തിലൂടെ പ്രേരിപ്പിക്കുന്നു. നമ്മൾ കാണുന്ന കാഴ്ചകളാണ് ശെരിയെന്നുള്ള മിഥ്യയെ ഉടച്ചു കാണിക്കുന്നുണ്ട് നിരീശ്വരൻ.
ആന്റണിയും ഭാസ്കരനും സഹീറും ചേരുന്ന ആഭാസത്തിൽ നിന്നും ഉടലെടുത്ത നിരീശ്വരൻ ദൈവത്തെരുവിനെ നിരീശ്വരത്തെരുവാക്കുന്നിടത്തു തുടങ്ങുന്ന കഥ പറച്ചിൽ. ആലും മാവും കൂടിച്ചേരുന്ന ആത്മാവിനെ ചുറ്റിനടക്കുന്ന സംഭവഗതികളിലൂടെ മിത്തുകൾ ഉണ്ടായി ജീവൻ വച്ചുവളർന്ന് അത് ഒരു നാടിന്റെ ചരിത്രമായി മാറുന്നതെങ്ങനെയെന്നുള്ള കൃത്യമായ നിരീക്ഷണങ്ങളുണ്ട്.
ഇരുപത്തിനാലു വർഷത്തെ അബോധത്തിൽ നിന്നും പ്രായത്തെ പിടിച്ചുനിർത്തി ഉണ്മയിലേക്ക് വരുന്ന ഇന്ദ്രജിത്തിലൂടെ പ്രകാശവർഷങ്ങൾക്കിടയിലൂടെ സമയത്തെ പിടിച്ചുനിർത്തി സഞ്ചരിക്കാനുള്ള ശാസ്ത്രത്തിന്റെ സാധ്യതകളും സമാന്തരലോകത്തെ (Parallel world ) മേഘയുമായുള്ള ബന്ധങ്ങളിലൂടെ ഒരു ആൾട്ടർനേറ്റീവ് സ്പേസിനെക്കുറിച്ചും ജെയിംസ് പറയുന്നുണ്ട്. മിത്തുകളിൽ നിന്നും ദൈവവും ദൈവത്തിൽ നിന്നും മതവും മതത്തിൽ നിന്നും വിശ്വാസികളും വിശ്വാസികളിൽ നിന്നും നിരീശ്വരവാദക്കാരും അവരുടെ തുടർച്ചയായി വീണ്ടും ദൈവങ്ങളും മതങ്ങളും ഉടലെടുത്തുകൊണ്ടിരിക്കുന്ന ചാക്രികക്രമത്തെ നിരീശ്വരന്റെ ഭൂതക്കണ്ണാടിയിലൂടെ ജെയിംസ് കാണിച്ചു തരുന്നു. വിശ്വാസരഹിതരെങ്ങനെ മറ്റൊരു വിശ്വാസ സമൂഹമായി രൂപം കൊള്ളുന്നുവെന്ന നേർക്കാഴ്ചകളും നിരീശ്വരനിലൂടെ വി ജെ വരച്ചിടുന്നുണ്ട്.
ഈ നിരീശ്വരചരിതം ഈശ്വരവിശ്വാസികളും നിരീശ്വരവിശ്വാസികളും ഒരുപോലെ വായിക്കണം.
അങ്ങനെ നിരീശ്വരന്റെ അപദാനങ്ങൾ ലോകമറിയട്ടെ...
Comments