ലഞ്ച് ബോക്സ്‌ ചിത്രത്തിലെ രുചികരമായ കൂട്ടുകള്‍....

                           ചില ചിത്രങ്ങള്‍ അങ്ങനെയാണ്. അത് നമ്മള്‍ ഒരിക്കലും പ്രതീക്ഷിക്കാത്ത ചില ബന്ധങ്ങള്‍ നമുക്ക് നേരെ വച്ച് നീട്ടുന്നു. ആ ബന്ധങ്ങളുടെ സത്യസന്ധതയില്‍ നാമത് വിശ്വസിച്ചുപോകുന്നു. അങ്ങനെയുള്ള വ്യത്യസ്തമായ ബന്ധങ്ങളുടെ പുതിയ തരത്തിലുള്ള അവതരണമാണ് LUNCH BOX എന്ന ഹിന്ദി ചിത്രം. ഭര്‍ത്താവിന് വേണ്ടി തൊട്ടു മുകളില്‍ താമസിക്കുന്ന ആന്‍റിയില്‍ നിന്നും  വളരെ സ്വാദിഷ്ടമായ recipee ശേഖരിച്ച് ഭക്ഷണം പാകം ചെയ്യുകയാണ് ഇല (നിമ്രത് കൌര്‍). എന്നാല്‍ ഉച്ചക്ക് വീട്ടില്‍ ഭക്ഷണം കൊണ്ടുപോകാന്‍ വരുന്ന ഡെലിവറി ബോയ്‌ വേറെ വിലാസത്തില്‍ ഭക്ഷണം ഡെലിവറി ചെയ്യുന്നു. അങ്ങനെ റിട്ടയറിംഗ് കാത്തിരിക്കുന്ന സാജന്‍ ഫെര്‍ണാണ്ടസിന് (ഇര്‍ഫാന്‍ഖാന്‍) ആ ഭക്ഷണം കിട്ടുന്നു. ഹോട്ടലിലെ മടുപ്പിക്കുന്ന ഭക്ഷണം കഴിച്ച് ശീലിച്ച ഏകനായി കഴിയുന്ന സാജനെ ആ ഭക്ഷണത്തിന്‍റെ സ്വാദ് വല്ലാതെ വശീകരിക്കുന്നു. തന്‍റെ ഭര്‍ത്താവിനല്ല ഭക്ഷണം കിട്ടിയതെന്ന് മനസ്സിലാക്കുന്ന ഇല അടുത്ത ദിനത്തെ ലഞ്ചില്‍ ഒരു കുറിപ്പ് കൂടി ചേര്‍ക്കുന്നു. അതൊരു പുതിയ സൗഹൃദത്തിന്‍റെ തുടക്കമാകുന്നു. ഭാര്യ മരിച്ച ശേഷം വിരസനായി റിട്ടയറിംഗ് കാത്തിരിക്കുന്ന സാജന്‍റെ ജീവിതം കൂടുതല്‍ സജീവമാകുന്നു. അയാളുടെ പോസ്റ്റില്‍ അടുത്തു വരുന്ന ഷെയ്ക്ക് (നവാസുദ്ധീന്‍ സിദ്ധീഖ്) നെ അയാള്‍ പലതവണ ട്രെയിനിംഗ് നല്‍കാതെ അകറ്റുന്നെങ്കിലും ആ ബന്ധവും കൂടുതല്‍ ശക്തമാകുന്നു. റിട്ടയറിംഗ് പ്രായത്തിലും ആ യുവാവില്‍ നിന്നും പല രസകരമായ പാഠങ്ങളും സാജന്‍ പഠിക്കുന്നു. ഇലയുമായുള്ള ബന്ധം കുറിപ്പുകള്‍ വഴി കൂടുതലടുക്കുമ്പോള്‍ പരസ്പരം കാണാന്‍ തീരുമാനിക്കുന്നു. ഇലയുടെ സൌന്ദര്യവും ചെറുപ്പവും ഇലയുമായുള്ള ബന്ധത്തില്‍ വിഘാതമായി സാജനു അനുഭവപ്പെടുന്നു. മരണം വരെ മരുന്നും ഭക്ഷണവും നല്‍കി അച്ഛനെ സ്നേഹിച്ച അമ്മയുടെ ചില ഞെട്ടിപ്പിക്കുന്ന വെളിപ്പെടുത്തലുകള്‍ സ്വന്തം ജീവിതത്തെ ഒന്നുകൂടി പുനരവലോകനം നടത്താന്‍ ഇലയെ പ്രേരിപ്പിക്കുന്നു.

                                 പല കത്തുകള്‍ കൂട്ടിവയിക്കുമ്പോള്‍ കിട്ടുന്നപോലുള്ള രസകരമായ  ഫീലിംഗ് ചിത്രത്തെ കൂടുതല്‍ വശ്യമാക്കിതീര്‍ക്കുന്നു.ഒരിക്കലും പോലും  കാണിച്ചില്ലെങ്കിലും മുകളിലെ നിലയില്‍ താമസിക്കുന്ന ആന്‍റി ശക്തമായ കഥാപാത്രാമായിതന്നെ ശബ്ദങ്ങളിലൂടെ കാഴ്ചക്കാരനെ സ്പര്‍ശിക്കുന്നു. പാന്‍സിംഗ് ടോമര്‍ പോലുള്ള ചിത്രങ്ങളിലൂടെ പകര്‍ന്നാട്ടത്തിന്‍റെ സാദ്ധ്യതകള്‍ നമ്മെ അനുഭവിപ്പിച്ച ഇര്‍ഫാന്‍റെ അമ്പരപ്പിക്കുന്ന അഭിനയമായിരുന്നു LUNCH BOX ലേത്. Hatsoff ഇര്‍ഫാന്‍ഖാന്‍... അരങ്ങില്‍ നിന്നും വെള്ളിത്തിരയില്‍ എത്തിയ നിമ്രത് കൌര്‍ ഉം മിതാഭിനയം വഴി പ്രേക്ഷകനെ സ്വാധീനിക്കുന്നു. നടനായും സഹനടനായും അവാര്‍ഡുകള്‍ വാരിക്കുട്ടിയ  നവാസുദ്ധീന്‍ സിദ്ധീഖിന്‍റെ കരിയറിലെ മികച്ചൊരു പൊന്‍തൂവലാണ് ഈ ചിത്രം. ധാരാളം ഇന്റര്‍നാഷണല്‍ അവാര്‍ഡുകള്‍ വാരിക്കൂട്ടിയ 2013ല്‍ ഇറങ്ങിയ ഈ ചിത്രം ഇപ്പോഴാണല്ലോ കാണാനായത്‌ എന്ന ചിന്ത അല്പം വേദന കൂടി എന്നില്‍ സമ്മാനിക്കുന്നു.